Рэспубліка Беларусь захавала ў календары святаў Дзень Кастрычніцкай рэвалюцыі як агульнарэспубліканскі святочны дзень і адзначае яго штогод 7 лістапада. Гэта яшчэ раз сведчыць пра тое, што беларускі народ шануе сваё гістарычнае мінулае. Бо дзякуючы ідэям Кастрычніцкай рэвалюцыі Беларусь захавала нацыянальную ідэнтычнасць, рэалізавала права на свабоду, незалежнасць, суверэнітэт. Нашы продкі абаранілі гэтыя вялікія заваёвы, каб перадаць іх наступным пакаленням. Менавіта з гэтымі сімваламі ў беларусаў, асабліва ў людзей старэйшага пакалення, шмат у чым асацыюецца Дзень Кастрычніцкай рэвалюцыі.

Кастрычніцкая рэвалюцыя 1917 года стала адной з самых значных падзей XX стагоддзя і карэнным чынам паўплывала на ход далейшай гісторыі. Людзі атрымалі права на працу, на адукацыю, на адпачынак, права ўдзельнічаць у кіраванні краінай. Гэта пачуццё свядомасці сваёй датычнасці да лёсаў краіны, магчымасць творчасці ў працы давалі нябачаныя вытворчыя вынікі, выклікалі энтузіязм і самаадданасць.

Дзякуючы Кастрычніцкай рэвалюцыі беларускі народ здабыў дзяржаўнасць, стварыў эканамічны і інтэлектуальны патэнцыял, збярог і ўзбагаціў нацыянальную культуру. Падзеі кастрычніка 1917 года дапамагаюць лепш зразумець наша мінулае і сучаснасць, бо ідэі аб'яднання і салідарнасці працоўных, роўнасці ўсіх людзей застаюцца актуальнымі і ў наш час.

Калектыў РЛСНЦ віншуе ўсіх са святам - Днём Кастрычніцкай рэвалюцыі. Жадаем моцнага здароўя, дабрабыту, поспехаў, міру і дабра. Росквіту нашай Айчыне - незалежнай Рэспубліцы Беларусь.